Úthlutunarreglur

1. Um sjóðinn og reglur þessar

1.1 Hlutverk

Vönduð blaðamennska er ekki ókeypis og almenningur þarf á henni að halda.

Glætan er sjálfstæður samfélagssjóður blaðamanna sem hefur það hlutverk að efla vandaða, sjálfstæða og samfélagslega mikilvæga blaðamennsku á Íslandi.

Markmið sjóðsins er að skapa svigrúm fyrir þá blaðamennsku sem hefur hvað mest átt undir högg að sækja. Blaðamennsku sem krefst tíma, úthalds og sjálfstæðrar rannsóknarvinnu; blaðamennsku sem veitir aðhald, upplýsir, skýrir og setur mál í samhengi.

Sjóðurinn styrkir verkefni um hvers kyns málefni. Umsækjendum er frjálst að velja viðfangsefni, nálgun og miðlunarform, enda uppfylli verkefnið skilyrði reglna þessara og sé ætlað íslenskum almenningi.

Glætan tekur ekki afstöðu til viðfangsefna, skoðana, niðurstaðna eða umfjöllunar styrktra verkefna.

1.2 Sjálfstæði

Sjóðurinn er sjálfstæður gagnvart stjórnvöldum, stjórnmálaflokkum, eigendum fjölmiðla, stofnanda sínum, styrktaraðilum og öðrum hagsmunaaðilum.

Styrkveiting felur hvorki í sér ritstjórnarlegt samþykki, áhrif á efnistök eða vinnslu verkefnis, né ábyrgð sjóðsins á endanlegri umfjöllun. Glætan les ekki yfir efni fyrir birtingu og samþykkir það ekki.

1.3 Um reglurnar

Reglur þessar eru úthlutunarreglur sjóðsins. Þær eru bindandi, gilda jafnt um alla umsækjendur og eru birtar á vef sjóðsins.

Leiðbeiningar fyrir umsækjendur og styrkþega skýra reglurnar á aðgengilegu máli en stofna hvorki ný skilyrði né víkja frá reglum þessum. Rísi vafi gilda reglurnar.

Reglurnar víkja fyrir ákvæðum skipulagsskrár sjóðsins ef á milli ber.

2. Fjármögnun og styrktaraðilar

2.1 Tekjur og uppruni framlaga

Tekjur sjóðsins geta verið framlög frá einstaklingum, fyrirtækjum, félögum, sjóðum og opinberum aðilum, auk ávöxtunar eigna.

2.2 Bann við eyrnamerkingu

Framlag má ekki binda við tiltekin efnistök, viðfangsefni, umsækjendur, miðla, landsvæði eða tiltekna niðurstöðu.

2.3 Framlag veitir engin réttindi

Framlag veitir hvorki rétt til setu í stjórn eða úthlutunarnefnd, aðgang að umsóknum eða vinnugögnum, vitneskju um úthlutanir áður en þær eru birtar, né áhrif á val verkefna eða styrkþega.

Sjóðurinn veitir styrktaraðilum engar upplýsingar um efni umsókna, hvorki fyrir né eftir úthlutun, umfram það sem birt er opinberlega.

Það er ekki fyrirstaða styrkveitingar að verkefni fjalli um styrktaraðila, starfsemi hans eða hagsmuni. Úthlutunarnefnd er óheimilt að líta til slíkra sjónarmiða. Styrktaraðili fær enga vitneskju um slíkt verkefni umfram það sem birt er opinberlega og ekki fyrr en aðrir.

2.5 Mat á framlagi og réttur til að hafna

Áður en tekið er við framlagi metur stjórn hættu á hagsmunaárekstrum eða orðsporsáhættu fyrir sjóðinn eða styrkþega hans.

Stjórn getur hafnað framlagi eða skilað því. Ástæða skal bókuð. Í ársskýrslu skal greina frá fjölda framlaga sem hefur verið hafnað og almennum ástæðum, án þess að nafngreina.

Stjórn skal leitast við að dreifa fjármögnun sjóðsins þannig að hann verði ekki fjárhagslega háður einum aðila.

2.6 Birting

Úthlutunarnefnd skal ekki fá upplýsingar um hvaðan fjármunir sjóðsins eru fengnir að öðru leyti en því að opinberlega skal birta upplýsingar um þá fjárhæð sem Blaðamannafélag Íslands styrkir Glætuna, hve há fjárhæð kemur frá hinu opinbera og hve há fjárhæð kemur samanlagt frá öðrum aðilum.

3. Stjórn og úthlutunarnefnd

3.1 Stjórn

Stjórn sjóðsins er skipuð fimm mönnum samkvæmt 6. gr. skipulagsskrár. Stjórn Blaðamannafélags Íslands tilnefnir þrjá, sem allir skulu hafa reynslu af eða þekkingu á blaðamennsku og einn þeirra jafnframt af fjármálum og fráfarandi stjórn kýs tvo. Kjörtímabil er tvö ár.

Skipulagsskráin er birt á vef sjóðsins og ræður um skipan stjórnar ef á milli ber.

Nöfn stjórnarmanna eru birt á vef sjóðsins. Þar sem úthlutunarnefnd starfar nafnlaust, sbr. grein 3.3, eru stjórnarmenn þeir sem svara fyrir starfsemi hans.

3.2 Verkaskipting

Stjórn sjóðsins fer með fjármál, fjáröflun og fjárfestingarstefnu, skipar úthlutunarnefnd, setur reglur þessar og ákveður heildarfjárhæð til úthlutunar í hverri lotu.

Úthlutunarnefnd tekur ákvarðanir um einstakar umsóknir. Ákvarðanir nefndarinnar um val styrkþega og fjárhæð einstakra styrkja eru endanlegar.

Úthlutunarnefnd er bundin af þeirri heildarfjárhæð sem stjórn ákveður fyrir hverja lotu, en að því marki einu.

Stjórn velur ekki styrkþega, endurskoðar ekki ákvarðanir úthlutunarnefndar, hefur ekki aðgang að umsóknargögnum og fær ekki upplýsingar um efni umsókna.

3.3 Skipan úthlutunarnefndar

Stjórn skipar úthlutunarnefnd sem í sitja þrír menn með þekkingu á blaðamennsku, fjölmiðlum, rannsóknum eða tengdum sviðum, ásamt tveimur varamönnum.

Að minnsta kosti einn nefndarmaður skal ekki starfa á íslenskum fjölmiðli og ekki hafa gert það síðastliðin þrjú ár.

Kjörtímabil er tvö ár og skarast.

Nefndin kýs sér formann sem stýrir störfum hennar, ber ábyrgð á málsmeðferð og er tengiliður við stjórn og starfsmann sjóðsins.

Nefndarmenn og varamenn starfa nafnlaust á meðan þeir sitja í nefndinni. Nöfn þeirra eru birt á vef sjóðsins þegar setu þeirra lýkur.

Nafnleyndinni er ætlað að verja sjálfstæði nefndarinnar gagnvart þrýstingi og trúnað um þær rannsóknir sem sótt er um styrk fyrir. Nefndarmenn skulu ekki gefa sig fram sem slíkir á meðan þeir sitja.

Sjóðurinn birtir fjölda nefndarmanna og þær hæfniskröfur sem gerðar eru til þeirra samkvæmt grein þessari.

3.4 Takmarkanir

Stjórnarmenn, nefndarmenn og varamenn geta ekki sótt um styrk úr sjóðnum á meðan þeir sitja og í tólf mánuði eftir að setu lýkur.

3.5 Samskipti

Nefndarmenn eiga ekki sjálfstæð samskipti við umsækjendur eða styrktaraðila um mál sem eru til meðferðar.

Fyrirspurnum umsækjenda og svörum við þeim er miðlað af starfsmanni sjóðsins og sambærileg tilvik fá sambærilega meðferð. Svör sem hafa þýðingu fyrir fleiri umsækjendur eru birt á vef sjóðsins.

4. Hverjir geta sótt um

Umsækjendur geta verið einstaklingar eða lögaðilar.

Umsækjendur skulu geta sýnt fram á reynslu af blaðamennsku, fyrri verk eða aðra faglega getu sem nýtist verkefninu.

Umsækjandi skal með umsókn lýsa því yfir að hann starfi eftir siðareglum Blaðamannafélags Íslands.

Styrkur frá Glætunni skal ekki koma í stað eðlilegrar greiðslu frá útgefanda eða miðli vegna birtingar verkefnis.

4.1 Sjálfstætt starfandi blaðamenn

Sjálfstætt starfandi blaðamenn sækja um í eigin nafni og geta sótt um vegna vinnuframlags og eftir atvikum vegna verkefnakostnaðar samkvæmt grein 5.5.

4.2 Starfandi fréttamiðlar

Blaðamenn hjá starfandi fréttamiðlum geta sótt um styrk til að vinna samfélagslega mikilvæga umfjöllun fyrir fréttamiðil sinn og sækja þá um styrk í samstarfi við ritstjóra eða fréttastjóra viðkomandi miðils. Umsóknin er sameiginleg og staðfest af bæði blaðamanni og viðkomandi fréttamiðli.

Umsókn skal fylgja yfirlýsing ritstjóra eða fréttastjóra um að sá eða þeir blaðamenn sem vinna munu umfjöllunina fái ráðrúm á tilgreindu tímabili til að vinna styrkta umfjöllun.

Umsækjendur skulu sýna fram á að verkefnið yrði ekki unnið á ritstjórninni án styrksins. Gera skal grein fyrir því hvers vegna verkefnið rúmast ekki innan venjulegrar mönnunar og verkefnaskipulags ritstjórnarinnar, hvað hefur staðið því fyrir þrifum hingað til og hvers vegna ritstjórnin getur ekki ráðist í verkefnið án styrksins. Ekki eru veittir styrkir til verkefna sem þegar eru á dagskrá ritstjórnarinnar eða hafin sem hluti af reglubundnu starfi.

Láti umsækjandi af störfum hjá miðlinum á verkefnistímanum skal tilkynna sjóðnum það án tafar. Úthlutunarnefnd getur þá heimilað að verkefnið haldi áfram á breyttum forsendum, enda sé birting tryggð, eða fellt styrkinn niður.

Blaðamaður í starfi sem hyggst vinna verkefni alfarið utan starfs síns getur sótt um sem einstaklingur samkvæmt grein 4.1. Í umsókn skal þá koma fram hjá hvaða miðli hann starfar og að verkefnið sé unnið utan starfsskyldna hans.

Umsókn skal fylgja staðfesting ritstjóra eða fréttastjóra um að verkefnið sé ekki hluti af starfsskyldum umsækjanda og að miðillinn geri ekki tilkall til vinnuframlags hans við það. Sé unnið að verkefninu á vinnutíma skal staðfestingin jafnframt taka til þess að umsækjanda verði veitt launalaust leyfi á meðan, hljóti hann styrk.

4.3 Teymi, ritstjórnir og samstarfsverkefni

Sjóðurinn er opinn fyrir samstarfsformum milli blaðamanna, ritstjórna, miðla og sjálfstætt starfandi blaðamanna, enda sé ábyrgð á verkefninu skýr.

Sé sótt um fyrir hönd hóps, teymis eða miðils skal tilgreina einn ábyrgðaraðila verkefnisins sem kemur fram gagnvart sjóðnum fyrir hönd allra verkefnisaðila.

5. Styrkhæf verkefni, styrkjaflokkar og kostnaður

5.1 Styrkhæf verkefni

Styrkja má rannsóknarblaðamennsku, gagnablaðamennsku, greinaraðir, heimildamyndir, hlaðvörp, sérhæfða eða staðbundna umfjöllun og önnur verkefni sem krefjast sjálfstæðrar rannsóknarvinnu.

Umsækjendur velja það miðlunarform sem hentar verkefninu best, hvort sem er texti, hljóð, mynd, gögn, myndrit, myndbönd eða samspil fleiri leiða.

5.6 Birting

Verkefni sem hljóta styrk skulu birt almenningi á sjálfstæðum, ritstýrðum vettvangi sem þjónar íslenskum almenningi og starfar samkvæmt siðareglum blaðamanna. Verkefnið skal birt á íslensku eða í íslenskri útgáfu.

Umsókn skal að jafnaði fylgja staðfesting frá miðli, ritstjórn eða útgefanda um áhuga á birtingu. Slík staðfesting felur ekki í sér skuldbindingu sjóðsins gagnvart miðlinum. Sæki sjálfstætt starfandi umsækjandi um vegna birtingar hjá miðli skal eftir atvikum fylgja staðfesting á fyrirhugaðri greiðslu; styrkur er viðbót við hana en kemur ekki í stað hennar.

Víki miðill frá venjubundinni greiðslu, eða birti umsækjandi verkefnið á eigin vettvangi, er heimilt að falla frá kröfu um staðfestingu á greiðslu. Umsækjandi skal þá gera grein fyrir fyrirkomulagi birtingar og tekjum af verkefninu í kostnaðaráætlun.

6. Umsóknir og mat

6.1 Umsóknargögn

Verkefnalýsing skal að hámarki vera þrjár blaðsíður. Sjóðurinn birtir umsóknarsniðmát á vef sínum.

Umsókn skal að lágmarki innihalda:

lýsingu á verkefni og markmiðum þess
greinargerð um samfélagslegt mikilvægi
framkvæmda- og tímaáætlun
kostnaðaráætlun
birtingaráætlun og upplýsingar um fyrirhugaða birtingu
stutta kynningu á umsækjendum og ef við á, öðrum þátttakendum í verkefninu, og dæmi um fyrri verk
og upplýsingar um aðra fjármögnun verkefnisins.

Kostnaðaráætlun og fjármögnunaráætlun skulu gera grein fyrir sundurliðuðum heildarkostnaði við verkefnið, umfangi vinnuframlags í mánuðum eða vikum, eigin framlagi umsækjenda og annarri fjármögnun.

Umsækjandi skal upplýsa um tengsl eða hagsmuni sem haft geta þýðingu við mat umsóknarinnar, þar á meðal tengsl við stjórnarmenn eða þá sem verkefnið fjallar um.

Umsóknir sem ekki uppfylla framangreind skilyrði skulu ekki koma til greina.

6.2 Matsviðmið og vægi

Umsóknir eru metnar eftir eftirfarandi þáttum.

samfélagslegt mikilvægi,
frumleiki og rannsóknargildi,
hvort verkefnið bæti nýjum upplýsingum við opinbera umræðu,
fagleg geta umsækjenda,
raunhæf framkvæmda- og kostnaðaráætlun
og líkleg áhrif verkefnisins.

Úthlutunarnefnd skal halda samræmda skrá um hvernig umsóknir eru metnar samkvæmt matsþáttum og rökstyðja ákvarðanir sínar byggt á þeim.

7. Málsmeðferð

7.1 Úthlutunarlotur

Stefnt skal að því að úthluta úr sjóðnum að lágmarki tvisvar á ári. Umsóknarfrestur skal auglýstur með minnst fjögurra vikna fyrirvara á vef sjóðsins ásamt heildarfjárhæð lotunnar og fyrirhuguðu vægi matsþátta.

7.2 Hæfisskoðun og mat

Að umsóknarfresti loknum kannar starfsmaður sjóðsins eða formaður nefndarinnar hvort umsóknir uppfylli formskilyrði reglna þessara.

Sé hægt að bæta úr formgöllum fá umsækjendur sama afmarkaða frest til að bæta úr sambærilegum annmörkum. Umsóknum sem berast eftir frest, eða uppfylla ekki formskilyrði að honum liðnum, er vísað frá og umsækjanda tilkynnt það með stuttum rökstuðningi.

Nefndarmenn meta umsóknir fyrst hver í sínu lagi samkvæmt matsviðmiðum og vægi þeirra sem úthlutunarnefnd ákveður og síðan sameiginlega á fundi. Rök fyrir niðurstöðu hverrar umsóknar eru skráð.

Náist ekki samstaða ræður afl atkvæða. Sé jafnt skal atkvæði formanns ráða. Ólík sjónarmið skulu bókuð.

7.3 Ákvörðun, rökstuðningur og tilkynning

Ákvörðun um styrkveitingar skal liggja fyrir innan sex vikna frá lokum umsóknarfrests og umsækjendum tilkynnt skriflega um hana.

Umsækjandi getur óskað skriflegs rökstuðnings vegna eigin umsóknar innan fjórtán daga frá tilkynningu og skal hann veittur innan fjögurra vikna.

8. Vanhæfi og hagsmunaskráning

8.1 Ástæður vanhæfis

Í svo fámennu fagsamfélagi sem því íslenska valda almenn fagleg tengsl ekki sjálfkrafa vanhæfi. Vanhæfi ræðst af nánum persónulegum, fjárhagslegum eða verkefnatengdum hagsmunum.

Nefndarmaður skal víkja sæti við meðferð umsóknar ef hann:

er umsækjandi eða meðal verkefnisaðila,
er maki, sambúðaraðili, skyldmenni í beinan legg, systkini eða tengdur umsækjanda með sambærilegum hætti,
hefur fjárhagslega hagsmuni af verkefninu eða af miðli sem verkefnið á að birtast á,
eða uppi eru aðrar aðstæður sem eru til þess fallnar að draga óhlutdrægni hans í efa.

Ákvæði þetta gildir einnig um stjórnarmenn, starfsfólk sjóðsins og utanaðkomandi ráðgjafa og matsmenn, eftir því sem við á.

8.2 Verklag

Hver nefndarmaður tilkynnir án tafar um vanhæfi komi það í ljós. Nefndin úrskurðar sjálf um vanhæfi einstaka nefndarmanna í vafatilvikum. Víki nefndarmaður sæti tekur varamaður sæti hans við meðferð þeirrar umsóknar einnar.

Víki helmingur nefndarmanna eða fleiri við meðferð sömu umsóknar skipar stjórn utanaðkomandi matsmann til að meta hana ásamt þeim sem eftir sitja. Matsmaður lýtur sömu reglum um vanhæfi og trúnað.

9. Trúnaður og meðferð umsóknargagna

9.1 Grundvallarregla

Umsóknir til Glætunnar geta haft að geyma óbirt rannsóknaráform eða viðkvæmar upplýsingar eða gögn sem geta stefnt bæði verkefnum og einstaklingum í hættu berist þau út. Meðferð þeirra tekur mið af því.

Umsóknir og fylgigögn eru trúnaðarmál og vinnugögn sjóðsins og skulu aðeins meðhöndluð og skoðuð af úthlutunarnefnd og starfsmanni sjóðsins að því marki sem umsýsla krefst.

Umsækjendur skulu ekki senda nöfn trúnaðarheimilda eða hrá rannsóknargögn með umsókn. Lýsa skal fremur tegund heimilda og aðgengi að þeim.

9.2 Trúnaðaryfirlýsing

Stjórnarmenn, nefndarmenn, varamenn, utanaðkomandi matsmenn og starfsfólk skulu undirrita trúnaðaryfirlýsingu áður en viðkomandi hefja störf fyrir sjóðinn. Trúnaðarskyldan er ótímabundin og helst eftir að setu eða starfi lýkur.

Nefndarmanni er óheimilt að nýta upplýsingar úr umsókn í eigin störfum, miðla þeim til þriðja aðila eða láta þær hafa áhrif á eigið verkefnaval.

Úthlutunarnefnd skal fara með hverja umsókn sem algjört trúnaðarmál.

9.3 Varsla, aðgangur og eyðing

Umsóknargögn eru varðveitt í lokuðu kerfi á vegum sjóðsins með skráðum aðgangi. Aðgang að umsóknum hafa einungis nefndarmenn, varamenn sem taka sæti og starfsmaður sjóðsins að því marki sem umsýsla krefst.

Vinnugögnum nefndarmanna, þar á meðal afritum og minnispunktum, skal eytt þegar ákvörðun hefur verið tilkynnt.

Gögnum umsækjenda sem ekki hljóta styrk skal eytt innan sex mánaða frá ákvörðun. Gögn styrkþega eru varðveitt á meðan verkefni stendur og í sjö ár frá lokum þess vegna bókhaldsskyldu.

Öryggisbrestur skal tilkynntur Persónuvernd og þeim umsækjendum sem hann varðar.

9.4 Nafnleynd styrkþega

Nöfn styrkþega eru ekki birt við úthlutun heldur fyrst þegar styrkt verkefni hefur verið birt almenningi, sbr. grein 13.2. Þar til er hvorki greint frá því hverjir hlutu styrk né hvaða verkefni voru studd.

Styrkþegi getur farið fram á að nafn hans verði ekki birt þótt verkefnið komi út, telji hann að birting geti stefnt öryggi hans, verkefninu eða vernd heimildarmanna í hættu. Stjórn tekur afstöðu til beiðninnar í samráði við styrkþega og getur fallist á ótímabundna nafnleynd. Fjárhæð, styrkjaflokkur og tengill á birt efni birtast þá án nafns.

Fjöldi slíkra tilvika skal koma fram í ársskýrslu.

10. Styrktarsamningur, greiðslur og eftirfylgni

10.1 Styrktarsamningur

Gerður er skriflegur samningur við hvern styrkþega áður en greiðsla fer fram. Í honum koma meðal annars fram styrkfjárhæð og greiðsluáfangar, samþykkt verkefnis- og tímaáætlun, fyrirhugaður birtingarvettvangur, skilafrestir, upplýsingaskylda, meðferð ónotaðs fjár og skilyrði niðurfellingar og endurkröfu.

10.2 Greiðslur og breytingar

Styrkir eru greiddir í einu lagi eða í áföngum samkvæmt samningi. Stjórn ákveður heildarfjárhæð til úthlutunar hverju sinni.

Verði verulegar breytingar á verkefni, tímaáætlun eða birtingu skal styrkþegi upplýsa sjóðinn án tafar.

Sjóðurinn getur óskað eftir framvinduskýrslu áður en síðari greiðsluáfangi er inntur af hendi. Slík beiðni felur ekki í sér rétt til að sjá óbirt efni.

10.3 Lokaskýrsla og uppgjör

Við lok verkefnis skilar styrkþegi greinargerð um framkvæmd, upplýsingum um birtingu og fjárhagsuppgjöri þar sem gerð er grein fyrir ráðstöfun styrksins.

Ónotað fé skal endurgreitt nema stjórn samþykki annað.

11. Merking stuðnings

Við birtingu skal koma skýrt fram að verkefnið hafi verið unnið með stuðningi sjóðsins. Nota skal eftirfarandi texta eða sambærilegt orðalag:

Verkefnið var unnið með stuðningi Glætunnar – samfélagssjóðs blaðamanna.

Heimilt er að stytta í: Unnið með stuðningi Glætunnar.

Styrkþegum er heimilt að nota merki Glætunnar við birtingu verkefnis og í kynningarefni tengdu því. Merkið skal birt á skýran hátt, án breytinga á útliti og þannig að ekki verði misskilið að Glætan beri ritstjórnarlega ábyrgð á efninu.

12. Niðurfelling og endurkröfur

Stjórn sjóðsins getur stöðvað greiðslur, fellt niður styrk eða krafist endurgreiðslu ef:

rangar upplýsingar voru veittar
verkefni er ekki unnið samkvæmt umsókn og samningi
veruleg brot verða á reglum þessum eða styrktarsamningi
styrkþegi hefur ekki gert það sem sanngjarnt má telja til að tryggja að stuðnings sjóðsins sé getið.

Áður en styrkur er felldur niður eða endurgreiðslu krafist skal styrkþega gefinn kostur á að koma sjónarmiðum sínum á framfæri eða bæta úr annmörkum.

13. Gagnsæi og ársskýrsla

13.1 Ársskýrsla og ársreikningur

Stjórn birtir ársskýrslu og endurskoðaðan ársreikning á vef sjóðsins innan sex mánaða frá lokum reikningsárs. Í ársskýrslu koma fram tekjur og sundurliðun eftir styrktaraðilum, úthlutanir eftir styrkjaflokkum, fjöldi umsókna og hlutfall þeirra sem hlutu styrk, rekstrarkostnaður sem hlutfall af úthlutunarfé, fjöldi vanhæfistilvika, nafnleyndartilvika, endurskoðunarbeiðna og hafnaðra framlaga og nöfn þeirra nefndarmanna sem lokið hafa setu á árinu.

Í ársskýrslu skal jafnframt greina frá nöfnum þeirra styrkþega sem hlotið hafa styrk og birt verkefni sín á árinu, ásamt heiti verkefnis og fjárhæð.

13.2 Birting upplýsinga um úthlutanir

Að lokinni hverri úthlutun birtir sjóðurinn fjölda veittra styrkja, skiptingu eftir styrkjaflokkum og heildarfjárhæð úthlutunarinnar. Nöfn styrkþega og heiti verkefna eru ekki birt við úthlutun.

Þegar styrkt verkefni hefur verið birt almenningi færist það í opið og leitarbært gagnasafn á vef sjóðsins. Fyrir hvert verkefni komi þar fram nafn styrkþega, heiti verkefnis, styrkjaflokkur, fjárhæð, ár úthlutunar og tengill á birt efni.

Styrkþegi skal senda sjóðnum tengla eða afrit birts efnis.

14. Gildistaka og endurskoðun

Reglur þessar taka gildi við samþykkt stjórnar Glætunnar.

Reglurnar skulu endurskoðaðar eigi sjaldnar en á þriggja ára fresti. Breytingar eru birtar með dagsetningu og útgáfunúmeri og gilda ekki um úthlutunarlotu sem þegar er hafin.

Samþykkt á fundi stjórnar Glætunnar þann 22. september 2026